Notizbuch 1979-82

Inhalt: Entwürfe zu 47 Gedichten (1 Endfassung)
Datierung: 21.8.1979-28.9.1982
Textträger: Blaues Notizbuch, grau-schwarze Tinte
Umfang: 102 beschriebene Seiten (+ U2/U3), hinterer Teil leer
Publikation: Abgewandt Zugewandt: Alemannische Gedichte (34/36)
Signatur: A-5-h/01 (Schachtel 29)

Bilder: Ganzes Buch (pdf)
Spätere Stufen: Manuskripte 1979-1983, Typoskripte 1983

Dienstag, 21 August 1979       )

Lozärn / 2 (A)

Ond am Museggeromgang schnogget mer alli
metenand henderem Hemel ond
henderem Allerheiligschte noche. Aber
mehr gsend nüd devo mer send jo
05 vil zchli. Mer gsend nor die vele
grosse Lüt, wo vor üs ond hender üs
ond näbe üs schnoggid. Ond alli
send schwarz agleid ond send
grau agleid. Ond es ged
10 fascht keni Manne, es ged // 002
nor Fraue, ond Manne
geds nor es paar
Alti ond die
schmöckid so komisch.
15 Ond es esch alles trurig ond es esch alles
grau ond mer weiss
ned worum, es isch jo
ganz schöns Wätter ond mer
merkt scho de Früelig ond ade
20 Museggmur hendd Bäum scho 
ganz monzigi Blättli. Ond die
bättid de Rosechranz, ond wenn si
fertig send, fönd si weder vo vore a, aber // 003
mer merkt, sie dänkid a alles
25 Möglechi andri debi. Ond alli
send froh, wenn s verbi esch ond
die ganz Prozässion weder onde
bem Nöllitor achond. Ond de Löw seid:
Chömid, jetz gömmer go Morechöpf ässe.
30 Onds Mami, wo emmer
grau <a>gleid esch ond emmer
schwarz agleid esch, seid nüd ond
potzt nor vor em Trinke
de Tasserand ab metem Nastuech.

Dienstag, 21 August 1979       )

Lozärn* / 3

Ond ds' Pfengschte träged sie all das Züg os de
Hofchele use, die selbrige Chöpf ond die
goldige Chöpf ond die glasige
Chäschte met de Chnoche voll Edelschtei
05 träged si use ond om d' Hofchele ome ond es 
Wäsmäli ufe. Ond met de silbrige Chöpf ond de
goldige Chöpf ond de gläsige Chäschte
träged sie riesig grossi // 005
Ampele us Pergament, fascht we a de Basler
10 Fasnacht. Nor send of dene Ampele ned we z' Basel
loschtige Gschechte abbeldet. Nei, of dene
Pfengschtampele gsed mer Gschecht
vom heilige Moretz, wener met de 
ganze thebäische Legion köpft werd oder
abegheit vomene Felse. Das weissi 
15 nömme genau. Of jede Fall esches // 006
eini vo dene grusige Gschechte,
we sie hufewis of dene alte 
Altarbeldere em Konschthus
abbeldet send. On de gets
au no Ampele met de
20 Gschecht vom heilige Leodegar, wene
böse König em lod lo
d'Auge usstäche. Die Ampele träget sie ond die
silbrige ond die goldige Chöpf träget sie // 007
ond die Glaschäschte mit dene Chnoche dren trägedsi
25 alles metenand us de Hofchele use ond om
d 'Hofchele ome ond of dere gschlänglete
Stross es Wesmäli ufe. Und au vo witem gsed das
wonderwie schön us, bsonders au, wel alli
Lüt be dere Prozässion Cherze // 008
30 hend i de Händ. Ond die Chärze
zäme met de Ampele ond met de
goldige Chöpf ond met de
selbrige Chöpf ond met de
gläsige Chäschte, das isch scho
35 schön amene Obig, wes donkel escht ond sogar
au no wenns rägnet. Aber am Ändi chond mer
weder vom Wäsmäli zrogg ond
dor d' Hofschtäge uf ond god
dor d' Halle dore weder // 009
40 ond dor d'Hofstäge uf e d Hofchele ine:
verbi am Grab vo de Grosstante Marie, wo Präsidäntin
vo de Jumpferebruederschaft gsi esch.
Si hed eigentlich emene andere Grab denäbe
welle legge, aber e anderi Jumpfere eschere zvor cho. E dem
45 andere Grab het sie e erem Teschtamänt gmeint, 
hät sie chönne öbere luege zom Pilatus. Ned nor, // 010
we jetz, ofene Mur. Jo no so de ome Pilatus
wärs jo net schad, das esch jo nor
e grusige Steihufe. Aber si häts
50 Seenachtsfäscht chönne gseh
met dene vele, vele rote ond blaue
ond grüene Ragete, ond metem Schlossbouqet zgueterletscht no.
Om das esches schad. Das hätsi // 011
chönne gseh osem andere Grab.
55 Ond wemmer verbi cho send met de
Pfengschtprozässion hämmer a das alles
dänkt ond händ es Vatter unser ond es Gegrüsst seist du Maria
bätet för d' Grosstante Marie. Nor wenn sie emene sone
gläsige Chnochechaschte ene gsie wär, de hätt mer
60 das chönne lo si, de hätt mer secher
gwüsst: D'Grosstante Marie esch em Hemel.

Mittwoch, 22 August 1979       )

Lozärn* / 4

Ond wemmer öbere See fahrt, wemmer
d' Seebrogg scho hed dehende
glo ond Chappelbrogg ond s'Zorgelgehus ond weter
dehende no d'Jesuitechele met dem
05 trurige Miserere ond met dem
mörrische Chrösch, wo sech nië wäscht, ond wemmer
de witerfahrt ond witerfahrt a de Trebsche
verbi, of de andere Site // 013
esch Seeborg ond esch Herteschtei:
10 Det, seid de Götti, het de
Keiser Karl es par Mönet omegsoret,
bes er de of Ongarn gfloge esch, wo me dä bös
Horthy igschpert hed ond z gueter letscht
en no e de Ängländere
15 usgleferet hed, ond die hend ne
of ene Ensle gscheckt,
dië hed Madeira gheisse. Ond dië
Ensle esch wüescht ond lär gsi, nor 
Felse ond Chees, onds rägnet
20 fascht emmer. Jo, das esch // 014
scho ne truurige Gschecht. Ond au Gschecht vom
Chendlimord esch truurig,
aber dië hemmer ned ganet¿, det chömid
nor gwönlechi Lüt vor oni
25 allgemeini Bedütig. Aber jetz semmer
scho be de Tällskapälle acho, ond det
chönt mer no a vell trurigers Züg tänke. Gott seidank
esch alles ned wohr. Aber mer chond
gar ned dezue, scho öberem // 015
30 Chrüztrechter nämlech heds
afo zuetue. Ond jetz em
Urnersee esch es ganz fischter, ond emmer
fischterer werds. Ond öberem Titlis ond
öberem Fronalpstock tuets
35 scho afoh tonnere. Ond jetz ganz of einisch
chonts ganz fescht cho go rägne. Do god mer
am gschitschte abe e Kejöte ond wartet, // 016
bes alles verbi esch. Aber
das duret lang. Ond zerscht
40 werds nor emmer schlemmer. Es rägnet
ond rägnet ond schöttet ond jetzt,
los ume¿, tots au no hagle. Die Chörner
tüend nor so abeplompse abe ofs Deck vom Scheff ond tüend
a d' Schibe vo de ronde Kajötefenschterli
45 poldere. Ond de See dosse, de See, wemmer einisch // 017
useluegt, esch er ganz ufgregt, das isch
jo e rechtige Schtorm, ganz eso we ufem Meer e de 
Büechere, wom mehr deheim hend. Onds wörd
eim gar net wondere, wenn au das gross
50 Scheff tät afo gwaggle. Aber
das tots ned, natürlech. Gwaggle
tüend no d' Seele. Mer chond // 018
gruusegi Angscht öber ond
fod a briegge vor Angscht ond bätet
55 met de Tant' Annie, wo
au Angscht hed ond
mit abe cho esch e Kajöte
eis Vaterunser am andere. De Tonner
esch jetz nämlech so lut,
60 dass mer sis eigeni
Wort nömme verschtot. Ond vom // 019
Bletz esch es jetz em
Fischtere of einisch so hell, we
e de Höll, wenn de Luzifer met
65 Pfusbagge es Füür ine blose.
Onds tued öberhaupt nömme
ufhöre met Bletze. Mer cha
nor no bätte, bes s' Scheff
ondergod ond
70 bes mer vertrinkt. Au wemmer
zom vorus weiss, das mer // 020
e d'Höll chond. Aber gli gli 
bevor mers nor gmerkt hed, fahrts Tampfscheff  
weder zwösche de Nase dore ond chond 
weder ine e dä liebi e chli düüssäligi 
75 Lozärner See, ond d'Wolke 
send wit dehende blebe, öberem 
Regi hets no es paar, öberem 
Pilatus aber scho gar keini // 021
meh. Ond Gschwöschterti, de 
80 Matt ond's Dörli¿, dië heimlifeisse, chrüchid 
os ere Angschtlöchere use ond tönd eim 
afo uslache we emmer öppe halt: 
wägem Briegge natürlech ond wägem 
Vatterunser ond 
85 wäg de Höll. S'esch jetz jo 
glich. S'esch jo so schön weder, s'Deck 
esch weder ganz troche. Ond jetz gsedmer // 022
au scho d'Seebrogg met de 
Fähne, emmer e 
90 Lozärner Fane näb eim 
vomene andere Kanton. Ond 's werd 
tonkel ond alli Törm send aglüchtet ond 
au d'Hofchele esch aglüchtet. Ond jetz tot sie 
au no afo lüte. S'esch doch ganz worscht, was 
95 Matt itzig¿ ond Dörli¿ för domms 
Züg sägid. Mer send jo // 023
scho vor em Konschthus, de Bronne, chonds eim vor, 
schprötzt vel höcher als schunsch. Jetz gömmer 
alli hei zom Löw ond ässid 
100 Böndnerfleisch ond Hungbrot ond tänkid 
nömme a'd Höll ond erscht nochethär em Bett no echli 
a d'Französischufgabe ond a's 
bös Gsecht vom Scholi, well mer 
scho weder es drü hed.

1981 * (nicht datiert)       )

Öbere

Öbere goh,
öbere laufe ond
däne bliebe ond
nie meh zrogg goh.
05 Es esch
alles benenand ond nümmeh
gohd usenand, alles
esch zäme.

Mittwoch, 16 September 1981       )

Ufe

Mer händ
ufe gluegt, ufe, ond hend
gseid, det sigs schön ond mer
gsäch wit ond mer gsäch
05 die ganz Wält bes zom
Matterhorn ond bes zom
Fäldbärg. Aber
nochethär do onde,
hemmer tänkt, sigs doch
10 weder schön, ond was well mer
emmer ufe ond abe ond
öbere ond äbe, äbe, we gseid,
emmer ufe. Do onde
esch doch de Bach ond de
15 Garte ond d' Vögel ond d' Blueme,
was wemmer no, was // 026
wemmer, hemmer
gseid, hemmer tänkt, was
wemmer det obe?

Freitag, 11 Dezember 1981       )

Chole

D' Chole abe träge e Chäller
ond ine schufle ond 
ufhüfele zomene
emmer höchere Hufe.
05 Ond de Chäller esch voll. 
Ond use träge usem
Chäller ond d Schtäge
uf träge ond ine
schufle e Ofe.
10 Ond es romplet ond romplet em Ofe. // 027
Ond d'Chole abträge
ond d'Chole devoträge
ond d'Chole ewäggschufle
ond d'Chole ineschufle.
15 Ond es romplet ond s tröhnt ond s esch warm.
De Chäller esch lär.

Montag, 28 Dezember 1981       )

New York I / Gönd er …

Gönd er öbere
gönd er ond hend er
ke Angscht, däne
sig nümeh, sig nüd
05 ond nümeh vo dem was er bes jetz
emmer gha hend es
Hus ond es Liecht
ond mängisch
e Wolke?
10 Ond de chömed er a ond s'esch
alles glichlig we do, 
do esch det ond det esch
do. Nor d' Loft do, d' Loft
det esch liechter ond
15 d' Hüser send // 029
höcher ond d' Lüt
schneller ond merkid
emmer ond öberal öppis
ond si send alli
20 trurig well si
scho do send, ond wohee wett mer no go
wemmer emmer scho do esch?

Donnerstag, 21 Januar 1982       )

New York II

Hend er das gseh, hend er die tonkle
Höf gseh ond die schwarze
Seck ganz onde ganz
onde ond de dröbert de-
05 näbe die glänzige, glänzige
Törm, nor Törm
eine am andre, sie nämedech,
si hebedech uf, si // 030
trägedech ufe ond gändech
10 obe am Hemel emmer
witer, eine gedech
em andre. Gönder
nor öbere gönder
nor äne gönder
15 nor ine, ond scho
send er obe em Hemel.

Donnerstag, 21 Januar 1982       )

New York III

Ond do schto ond
warte hät mer das ned au
chönne als emmer
hendere noche laufe // 031
05 ond emmer no witer
före tröcke ond före. Dehende
blibe was wotsch
dehende au eso chontsch
no gnueg früe före no
10 vel z früe chontsch
före eso ond of einisch
schtosch z vorderscht
ganz z vorderscht
de chansch nömme zrogg de
15 muesch ufe go ufe de muesch
die ganz Schtäge de muesch
Schtafle för Schtafle eini
ufe laufe noch de
andere muesch
20 ond niemer me esch de // 032
gar niemer me esch de
vor dehr. Ond du chansch
nömme henderzi ond
chansch nömme abe. Jetz besch
25 ellei vore, besch
elei ganz elei dobe
sie nänd di
chantsch nömme zrock
chantsch
30 nömme abe
si hend di si hend di.

Donnerstag, 04 Februar 1982       )

Schwöre

Schwöre to nor
schwöre bem heilige
Leodegar ond bem
heilige Felix ond bem
05 heilige Joscht ond be de
Bluetstropfe vo
Willisau ond bem
Heiligchrüz jo ond au no
bem Heiligchrüz jo
10 schwöre to nor emmer
schwöre bem heilige
Hus em Hergiswald obe ond bem
heilige Franz em // 034
Hergiswald obe jo
15 schwöre to nor emmer
schwöre ond au no be allne
arme Seele dobe em
Hergiswald be de arme
Seele wo alli tönd brönne wo alli
20 dobe em Hergiswald em
Fägfür tönd brönne to
nor schwöre nor emmer
schwöre ond au no
wenn alles nüd nötzt wenn alles
25 lätz esch ond alles
nüme nötzt au no // 035
be de Mondschtei jo
au no be de Mondschtei
denne em Beregger-
30 wald jo zmetzt
denne em Bereggerwald jo
to schwöre to nor 
zgueter Letscht au no
schwöre of d Mondschtei
35 zmetzt of de Liechtig zmetzt
em Bereggerwald wo no niemer
gfonde hed ond wo no niemer
gseh hed jo to nor
schwöre to nor emmer 
40 schwöre gäll
aber pass uf.

Donnerstag, 04 Februar 1982       )

New York IV

Ond de hani Angscht öbercho ond
ha tänkt es esch alles
glichlig we emmer es esch
alles glichlig we emmer ond esch
05 alles ganz andrisch ganz andrisch es esch
alles do wes emmer gsih esch d Wolke-
chratzer ond d Subway
ond vor allem de Groch jo
vor allem dä komisch
10 Groch us allne
Schächte ufe ond us allne
Hüsere use ond wemmer
denne esch <e> de Hüsere // 037
vo de Stross dor d Fenschter
15 ine dä Groch dä komisch
Groch we vo frömde vo
scho lang vertorete frömde
scho lang vertrochnete Blueme
dä komisch Groch dä süesslech
20 Groch dä esch au emmer no glichlig
gsih ond är esch anderisch gsih
alles esch ganz anderisch gsih ond die alte
farbige Hüsli zwösche de
Wolkechratzere enne ond die verrockte
25 toskanische Ville of de
alte Wolkechrätzerli em Village
obe alles alles esch glichlig // 038
gsih ond de Groch jo dä
komisch dä süesslich Groch
30 us de Schächte use ond us de
Hüsere use ond dor alli 
Fenschter ene e d Hüser
esch glichlig gsih we ner
emmer gsih esch ond esch
35 ganz andrisch gsih alles
esch ganz andrisch gsih ond ech
ha Angscht öbercho
öb ech öppe nömme
de Gliechlig sig ond öb ech öppe of einisch
40 e andere sig e grusigi Angscht.

Samstag, 06 Februar 1982       )

Führ

Aber das schmöckt das schmöckt scho
vo witem vo hende vo ganz
wit hende före usem
Götschwald ond usem
05 Littauerwald hende före
schmöckts ond
emmer feschter ond emmer
feschter wennt
dore gohsch dore Götsch-
10 wald ond ine gohsch e
Littauerwald schmöckts
emmer feschter noch
Rauch ond deh
gsehschs Führ ond deh // 040
15 gsehsch d Lüt oms Für ome
si tönd
Escht ine rüere es Für ond emmer
meh Escht tönd si ine
rüere wit ome hets scho wit
20 ome hets scho kei Schnee meh
die Escht die töhre
Escht we si tönd brönne swerd hö chschti
Ziht gang weder gang schontsch
gsehnds di zletscht no schontsch
25 chömedsi zletscht schömedsi
no dech cho foh.

Sonntag, 07 Februar 1982       )

Schtrooss

Wemmer dië lang wemmer
dië lang Schtross hedmer
de Hemmel wene Teckel
öberem Chopf.
05 Wemmer dië lang ond
breit wemmer dië breit Schtrooss hedmer
de Hemmel wene isige
Teckel öberem Chopf
wemmer dië lang ond
10 breit ond schnuergrad wemmer dië
schnuergrad Schtross hedmer de
Hemmel we ne isige schwäre
Teckel öberem Chopf
wemmer dië lang ond
15 breit ond schnuer-// 042
grad ond lähr wemmer dië lähr
Schtrooss ufe gohd oder
abe goht hed mer emmer de
Hemel we ne isige schwäre
20 ond lengger-
hand send alli ond rächter-
hand send alli Sarg-
teckel ufem Chopf
Tori ond alli
25 Töre zue ond mer lauft
ond lauft ond
chond ond chond a kes
Ändi wemmer dië lang
wemmer dië breit wemmer
30 dië schnuergrad // 043
wemmer dië lähr.

1982 * (nicht datiert)       )

Ond nömme

Ond jetz denne ond jetz
däne ond jetz
dobe ond de
ganz donde scho
05 weder donde
ond de of einisch
scho weder denne zmetzt
enne ond de
dehende dehende nei
10 ned vore ond ned
off de Site nei nei
dehende hender
allem hende dehende // 044
Ond jetz före jo
15 hender allem före ganz
före ond nömme dehende ond
ufe ond ufe ond ähe ond
dröbertöbere ond emmer
no ufe ond emmer no witer
20 ufe ond jetz ond
einisch ond früecher
ond vel früecher de
weder abe ond
schpöter vel vel
25 schpöter hendere ganz
hendere ond det dehende
niëmer meh nümeh // 045
Ond erscht zoberscht ond erscht
zonderscht öberall nümeh
30 ned emol es monzigs
chlis Betzäli meh
zoberscht ond zonderscht ond
abe ond ufe ond äne
ond före ond hendere zmetzt
35 ond dezwösche ond einisch
ond früecher vel
früecher ond schpöter schpöter
einisch ganz schpot ond deh
nüd meh ond niëmer meh
40 nömme.

Montag, 08 Februar 1982       )

Öpper ond öppis …*

Öpper ond öppis
niëme ond niëmer
niëmer ond niëne me öppis.
Z'henderscht ond z'vorderscht ond z'onderscht
05 ond z'oberscht ond zmetzt
ond dezwösche jo au dezwösche
nüd meh ond niëmer
ond nömme

Donnerstag, 18 Februar 1982       )

Lose ond luege

Abe lose ed Chammere abe
we s gorglet
ond abe luege e d Chammere abe
dä schwarz
05 Naue deht hende
wer ächt hedne
donde em Schatte
lo schtoh ond of was
tod er warte?

Montag, 22 Februar 1982       )

D' Gottere

Zue gmacht d' Gottere
ond abegloh d Rüs
abe ond d Aare ond de
Rhien abe gloh ond emmer
05 wieter abe bes abe
zom Meer ond deh
use es Meer gloh ond emmer
ond emmer wieter ond emmer
wieter met ere use bes es
10 wiet ond breit kei Ensle
meh hed ond keis Scheff
ond au kei Vogel ond deh
use met em Zapfe ond deh // 049
dië Gottere ufgmacht.
15 De Schwan wener use chond us de
Gottere, lueg, ond wener d'Flögel
ufschtellt ond wener de Hals
schtreckt ond ruig als wärs
nor vo Wäggis of Vetznau eifach
20 devoh tued schwemme ond ganz
ganz wiht osse verschwende.

Dienstag, 02 März 1982       )

Wötsche verwötsche

Hesch gsuecht ond
beschem nocheglaufe ond
heschs gseh mer hets
dr nor welle schpienzle
05 schpienzle vo witem
ond gseh vo
witem ond lang
nochelaufe ond
schnufe ond
10 äntlech ond
äntlech verwötsche.
Aber deh esch es
scho z schpot deh
esch es scho weder // 051
15 ewägg gwötscht
zom Fenschter zom
Guggehrli use
eschs gfloge devoh
ond ewägg
20 chuhm
dass es verwötscht hesch
wötscht s scho weder
devo zor Tör us zom
Fenschter us wötschts
25 zom Guggehrli use
obs ächt
weder einisch verwötschisch?
Gseh ond gschpienzlet
ond nochglaufe ond
30 gnoh ond scho weder scho
weder devogwötscht zom // 052
Guggehrli us
gwötscht ond devoh
gfloge chonts ächt
35 weder zrogg
zrogg weder einisch?
Gschpienzlet ond devoh
gwötscht ond nochet-
här doch no
40 verwötscht ond
gfange ond gnoh
ond deh am Ändi
lostoh ond emmer am
Ändi lo goh
45 ond lo laufe. Verwötscht
ond gfange ond gnoh // 053
ond losloh
ond losloh am Ändi ond
abegheie abe ond emmer
50 witer abe de
Weier em Schelf
zmetzt denne ond metem
Scheffli ine fahre ganz
ine es Schelf es
55 Bocheli velecht ond e
Libelle velecht ond
niemer schontsch
niemer losloh los
ond lo goh ond
60 lo laufe lo gheie ond emmer
loslo loslo lo goh.

Sonntag, 07 März 1982       )

Chosle

Tosch chosle onds
öberlauft onds
lauft öbere Täller
ond öbere Tesch tosch
05 chosle onds tropfed
vom Tesch abe a Bode ond s tropfed
ond tropfed ond lauft
am Bode dors ganz
Zemmer ond erscht de-
10 hende em Egge laufts tosch
chosle tosch
chosle zäme
zomene Tömpel.

Samstag, 13 März 1982       )

Fredetal

Ond d Berewegge ond
d Läbchüeche do chantsch
lang gigele öber dië
marmorige Ängel em
05 Fredetal ond we si
tönd früre em Schnee
fascht blott ond nome
meteme Hömmli a
ond d Berewegge ond
10 d Läbchüeche do chantsch
tampe do chantsch
pressiëre dië
marmorige Ängel die
chömid dië // 056
15 tüsselid hender der noche
ond lönd nömme logg ond 
d Berewegge ond
d Läbchüeche jo
mer ghört di scho charchle.

Freitag, 02 April 1982       )

Gfrörni

Met eme Gfrörni am Zeche
chantsch lang go
briëgge chantsch lang
hättisch ned gaugglet
05 hättisch ned gapped
verosse hättisch de Fuess
ned use lo plampe de Schmotzli // 057
de Cheusi dä cha
der ned hälfe de chantsch
10 no so mängisch zuenem
es Chämmerli tühssle dä chantsch
no so mängisch zuenem
hendere tühssle de chantsch
no so lieslig ond lieb
15 go chlöpfele a sini Töre
ond müede ond brüele de chantsch
lang go briëgge.

Mittwoch, 14 April 1982       )

Schlöttli ond Gschtältli

Was förnes Schlöttli
ond onderem Schlöttli
was förnes Gschtältli
hesch amel agha?
05 Ond onderem Schlöttli
ond onderem Gschtältli
ond oni Schlöttli
ond oni Gschtältli
sigisch usegange seidmer
10 sigisch mängisch usegange e
Husgang use ond d'Schtäge abe
sigisch gange seid mer, jo,
oni Schlöttli ond oni
Gschtältli segisch use gange // 059
15 ond abegange ond e Hof use
gange seid mer
dosse em Hof heigisch
em Göselchöbel ome göslet
die ganz Nacht heigisch
20 göslet amel ond niemer heig öppe
öppis gseid, jo, niemer
heig trout
öppis z'säge, debie
heigisch göslet ond
25 göslet ond oni
Schlöttli ond oni
Gschtältli ganz
blott heigisch em Gösel- // 060
chöbel voll Gösel
30 omegöslet, seid mer,
säg emol, säg,
was förnes Schlöttli
ond onderem Schlöttli
was förnes Gschtältli
35 hesch amel agha,
säg emol, säg?

Mittwoch, 14 April 1982       )

S' Liebli

Ond emene wiesse
Liebli sig de
Tod use cho hed mer
gseid ond är heig e de Hand e
05 glänzigi Sägesse gha, jo,
ond er heig nome es wiesses
Liebli agha öber sim Greppi
seid mer, ond das sig
grad gäbig gsi, seid mer, mer heig
10 dor sis Liebli dore em Tod
seni Reppi, seid mer,
ganz reng chönne zelle.

Mittwoch, 14 April 1982       )

Et in Arcadia ego

To ned müede to
ned sahge ech
chome ech chome ghörsch s Mühsli
ned scho chröschpele ghörsch
05 s Mühsli ned scho tüssele
denne em Hüsli denne
onder de Teli, meintsch öppe
meintsch, ech täg tampe, neinei, ech
tone nome ned hösle mosch
10 ned müede mosch ned sage mosch nur
nochli beite mosch nor // 063
nochli gaume ech chome.

Montag, 19 April 1982       )

Öberegluegt – henderegluegt

Öberegluegt hed er ond zvorderscht
esch er gschtande ond nie
hed er henderegluegt
aber of einisch
05 hed er nömme witer
gwösst ond hed nömme
försi chönne als hätter
Angscht gha är wär
eifach abegheit, vore abe en es
10 Tobel abe är hed
nömme chönne öberluege // 064
ond zvorderscht heder au nömme
chönne schtoh är hed nor no als
wär er schontsch abegheit en es
15 Tobel
hendere hendere gluegt.

Montag, 19 April 1982       )

Echli

E chli tänke
muesch halt wentöppis
welsch mache bevor no
tuesch afoh muesch echli
05 tänke du besch doch
ke Schlofi muesch grusig
ufpasse wentöppis
welsch mache wentöppis
welsch afoh schonsch chond jo // 065
10 nië öppis Rächts use
wemmer nor hodlet ond
wemmer ned ufpasst. Aber
du du besch doch ke Schlufi
du tänksch doch du
15 passisch doch uf, du hesch doch
früecher emmer went öppis
agfange hesch zersch
lang nochetänkt ond de
ersch besch meteme Zeche es
20 Wasser ond de ersch metde
andere Zeche, jo jo, du weisch scho, ond erscht
deh besch langsam försigange
e Schlofi aber e Schlofi besch nië gsih.
Muesch
25 e chli tänke

Samstag, 24 April 1982       )

Öber Rom flühge

Ond deh ond deh moss mer nümme
go Zobig näh ond moss nömme
zom Beck go Chäschueche ond go
Mohrechöpf chaufe
05 mer cha de
eifach vom Tach
abegompe ond es machtt
nüd ond es
passiërt eim nüd
10 wenn de
Wend chond ond wenn de Räge
vom Palatin öbere chond
öbere Corso mer cha de
eifach abegompe vom Tach // 067
15 ond de Wend
fohd eim uf ond treit eim ond
treid eim lieslig
ond höch öber alles
ewägg. De chönd dië
20 Porschte det onde off de
Piazza Navona no so
haleegere, de cha dië
Frau det of em Campo
no so luut geitsche.

Samstag, 24 April 1982       )

Ond was wellsch au

Ond was wellsch au no
ome tschomple em Räge dor
t' Schtroosse tschomple ond hesch
nass a de Füesse ond hesch au scho
05 chalt a de Wade
was welsch
ometschomple zmetzt e de Nacht
ond niëmer meh esch
ome nor Auto nor Auto
10 fahrid verbi ond
schprötzid eim a ond denne // 069
onderem  Tschope
onderem Hömmli de
Worm wo
15 bohret ond bohret
ond biesst ond dorom
mosch emmer no wieter
tschomple aber det äne
lueg onder de Pösche tüentsi
20 scho d Zweig
abschniede, lueg,
sie tönd si scho schehle.

Dienstag, 04 Mai 1982       )

Ond do hesch

Ond de hesch
dië Wolke fascht no
verwötscht wo
öberegrötscht esch
05 öbere Hemel
aber of einisch
esch si schtell gschtande
öber me offene Loch em
Tach vomene grosse
10 Huus ond esch
ufgange ond use-
nand ond hed alles
Wasser wo ennere
enne gsih esch lo
15 use laufe ond lo
abeschprötze of nes
Särgli meteme // 071
Chnochemanöggäli
dren met enere goldige
20 Palme ede
gschtabrige Fenger
wo donde
gläge esch e dem Loch
Ond do hesch dië
25 Wolke nömme
trout z näh du hättesch
jo nassi
Händ öbercho ond
öberhaupt …

Freitag, 07 Mai 1982       )

Blöhsele

Blöhsele blöhsele
ond deh gohts
uf ond werd
grösser ond grösser
05 bloose, bloose ond deh
werds gruusig ond
werds osennig
gross ond tröckt eim
zäme ond
10 tröckt eim
eifach a d Wand äne ond
ufe a Teli
mosch halt nömme // 073
bloose tafsch au
15 nömme blöhsele nei
ned emol meh blöhsele
tafsch ond deh
mosch nome luege es werd
chliener ond werd
20 emmer chliener ond
werd ganz monzig
ond verschlüft sech
e Bode ond esch
zletscht niëne meh
25 eifach gar nömme do.

Sonntag, 09 Mai 1982       )

Zië

Zië am Fahde
zäch mer chan e
gar ned verriesse
är werd
05 emmer tönner är werd
emmer länger
ond deh of einisch
rötscht mer
uhs ond gheit om de
10 Fahde hed es
ganzes Schtöck Mur
use gresse aber
s esch z schpoht är esch
z lang s Loch esch
15 vel z wit ewägg mer cha
ned useluege

Mittwoch, 26 Mai 1982       )

Gosle

Wenn ehr ome goslid em
Chöbel fendid ehr
donde am Bode vom Chöbel
zletscht nor Wörm ond dohrom
05 tüend liëber ned gosle
tüend liëber 
Wasser dri ond emmer
meh Wasser bes de
Chöbel ganz voll esch ond
10 glatt ond
glänzig vo eim
Rand zom andere
Rand mer cha de meteme wiesse
Papierscheffli öbere fahre vo eim
15 Rand zom andere // 076
Rand ond weis nüd ond gsehd
nüd vo dene gruhsige
Wörm donde
am Bode vom Chöbel.

Donnerstag, 27 Mai 1982       )

Lesme

A dem lange
Schtrompf lesme ond är
werd emmer länger
ond länger ond emmer
05 wieter lesme
ond wieter ond nömme
ufhöre met lesme de Schtrompf
lampet öber d' Schtähge
abe öber alli
10 Trett vo de Schtähge // 077
lampet er abe
ond zonderscht
wonderid alli sech
wo verbiechömid wohär
15 chond ächt dä Schtrompf ond wer
lesmet dra ond wer
mosne alegge am Ändi wer hed
gnueg langi Bei zom dä Schtrompf
azlegge am Ändi?

Freitag, 04 Juni 1982       )

Escorial

Ond donde went dor t' Chäller
tühssälisch ond e toti
Chatz ewägg schöpsisch
oder au mängisch in es Näscht voll
05 chlini Müsli
ine trampisch chontsch
zletscht zo de Glas-
chäschte met ustrochnete töre
Lihbere dren ond si hend keni 
10 Hor me ond d Chleider send nor no
Lömpe ond send oni
Farb we Motte em Schrank – wenn si
gsächsch aber s esch grusig
tonkel du ghörsch nor wes
15 tued chröschpele onder // 079
dine Schuene bem Laufe.
Aber am Ändi de doch no
ganz vore of einisch e chlih
Liëcht vo obe useme
20 Fenschter wo mer ned gsehd
es Schtägäli wene
Leitere fascht ond dobe
e Töre. O wië
gohds do of einisch
25 wiht wiht use ond vel 
vel monzegi Sommer-
vögäli chömid us de
Bösche före wene
Wolke e wihssi.

Mittwoch, 30 Juni 1982       )

Är heig

Är heig
rübis ond schtübis alles
lo sih ond
lo schtoh ond lo legge
05 är heig
rübis ond schtübis
alles vergässe
är sig
onder d Brogg
10 gsässe är heig
dië ganz Nacht s Wasser
agluegt wes a ehm verbie
glaufe sig
ond nor ganz lieslig
15 gruscht heig // 081
ond gschtrodlet är heig
nümeh tänkt ond
nümeh welle ond
rübis ond schtübis
20 alles alles
lo sih ond alles
vergässe ond metem
Wasser heigers
abe lo laufe
25 metem schwarze
Wasser heigers
abe lo laufe de
Floss ab ond d Schtrohsse- // 082
lampe dobe ofem
30 Trottoar am Gländer dië sigid
wiet wiet ewäg gsie
ond wenn si
gwagglet heigid em Wend so heig är
gmeint das sigid
35 Lüht vom Mars oder vomene
andere Schtärn wo ehn
chemmid cho hole
aber das sig ehm
alles ganz gliech gsie är heig
40 rübis ond schtübis met allem
ufgruhmt är heig
nümeh gwösst ond // 083
nümeh tänkt ond
nümeh welle är heig ....
45 Aber säg das
gets doch gar ned das gets
doch nömme das eine
eifach doh setzt ond d Füess
lohd lo
50 abeplampe es Wasser
oder meintsch de meintsch de
är heig .... aber nei
mer wend jetz rübis ond schtübis met allem
ufruhme ond alles
55 vergässe ghörsch nehd we of einisch d Zikade
weder tönd senge?

Donnerstag, 01 Juli 1982       )

De Schoppe

Gömmer e Schoppe ond s Schtroh
chröschpelet onder de Füesse
das lang
Plange esch äntlech
05 verbie mer gschpöhrt vo dehr
de Schnuuf ond vo mehr
ganz warm of einisch
chröschpelets nömme s esch
weich dohinde em Schoppe s esch
10 heiss ond ghörsch
(s Meer) wes tod ruusche?

Montag, 12 Juli 1982       )

Lueg nor

Lueg nor ome
lueg nor de gsehsch
dass der niëmer
z leid wärcht wenn jetzt of einisch
05 d Wolke de Nomitag schwarz
machid das esch
nor wels uhs-
schnuuft ond ih-
schnuuft ond ned
10 glihchlig cha blihbe ond d Köpf
vo de Negle send scho
glänzig vom Rähge.

Mittwoch, 14 Juli 1982       )

Zerlina zu Masetto (A)

Muesch doch ned Angscht ha
ech beh be der 
ha dech, heschs nonig gseh 
gärn emmer meh 
05 ech ha au öppis do 
das tued der guet 
das tued der schüli guet 
well dine Chommer ha 
gschpörsch ned, wes böpperlet 
10 läng emol a

Donnerstag, 15 Juli 1982       )

Zerlina zu Masetto (B)

Muesch doch ned Angscht ha
ech be be der
ha dech, heschs nonig gseh,
gärn emmer meh.
05 Ech ha au öppis do
das tued der guet:
Los nor, we s chlöpfelet
s well dine Chommer ha
das tued der schüli guet
10 gschpörsch ned wos böpperlet
läng emol a.

Donnerstag, 26 August 1982       )

D' Wäje

Zersch
heigedsi zäme dië gross
Wäje gässe ond deh 
heigs klöpft ond sie heigid
05 enand Wätsch gäh:
öb die Wäje e ehm
gsi sig oder e ehre.
Mer heigs
nömme gwösst ond
10 si heigid ja doch nor emmer es Mötti // 089
gmacht anenand äne es sig
nömme drof ahcho. Ond wenn si
erscht vernoh hät är heig
vom Wäje vel meh
15 als d Helfti gässe är sig
ganz lislig e Chochi
use tüsselet ond heig
de ganz Reschte ufgässe
rübis ond schtübis.
20 Was för nes Mötti erscht
hättsi deh gmacht?

Freitag, 07 August 2015       )

De Chäswäje

Dië Chäswäje
wo doch e mer esch
wo doch ned e der esch
metenand ässe jo
05 ech geb der öppis devo
es chlis
Schtöckli geb ech der devo
mer tönd ne
metenand ässe
10 ond nochethär laufet mer
metenand derekt ine
e Ofe zmetzt
drin ine laufet mer deh
ond setzid ofs Bläch
15 ond hend no // 091
de Guh vom
Chäschueche em Muhl
d Hetz vom
Chäschueche onderem Födli.
20 Ond deh
gohts nömme lang ond gleitig
wärdet mer bachet zo was
förere Wäje ond wer
hed gnueg Gloscht zom üs ässe?

Donnerstag, 26 August 1982       )

De Hof

Ond nochethär hemmer
üs ganz igmommlet ond hend üs
ganz hende dehende
e Hof ofs Bänkli
05 gsetzt bes d Frau vom
Hof cho esch met de
Schlössle ond gseid hed es sig
jo scho Morge mer sellid
jetzt hei go si heigid
10 secher scho lang of üs
gwafrtet onds Zmorge
sig secher au scho
barad ond deh fieng // 093
– oder öppe ned? –
15 am achti au t Schuel a. Ond deh
hed si üs d Chällertöre
uf gmacht ond hed üs
öber dië hender 
Schtäge ufegscheckt
20 ond scho vo witem
hemmer d Chole em Chole-
chessel ghört romple.

Freitag, 27 August 1982       )

Einisch

Einisch weder einisch
metenand ofe
Napf ufe
oder wellsch liëber ofe
05 Schembrig ufe of
d Schratteflue dië
wüeschte dië
schpetzige Schtei
we Mässer dië
10 bluetige Füess
Aber de Napf dië
wiesse Blueme ond // 095
d Busälischtärndli
fort fort ond
15 d Hommle brommlig
wië Elephante
d Heuschtöffel
wië grüeni Giraffe.
Ond lang lang
20 schlofe wer weis
was för Ziet esch nor öppe
einisch e Flüger
vom Meer velecht chond er
diräkt ond grad vorig
25 esch er höch
obe öbere gfloge
öber d Principessa Mafalda.

Montag, 30 August 1982       )

Ond de tänkt mer (A)

Ond e Wald ine ond
emmer wieter
ine e Wald ond ke
Wäg meh ond
05 nome Brögel ond nomen Escht
ond ufpasse ond jo ned
schtörchle jetzt chond nämlech
z metzt enne de See
schtell schtell ond 
10 ganz rond we de Vollmond. // 097
Mer tänkt wenn jetz nome
nümeh andersch wörd
ond alles emmer ond ewig
wörd grad eso
15 bliebe wes esch.

Dienstag, 31 August 1982       )

Ond de tänkt mer (B)

Ond emmer
wieter ond wieter
ene e Wald ond ke
Wäg meh ond nome
05 Brögel ond nomen Escht
mer tänktwen jetz nome
ond jo ned schtörchle
zmetzt enne chond jetz
mer tänkt nämlech am Ändi
10 de See schtell ond
rond wede Vollmond
mer tänkt wen jetzt nome
nümeh wörd andersch
ond alles emmer ond ewig // 098
15 wörd grad eso
bliebe wes esch.

Donnerstag, 02 September 1982       )

Lieslopf

Was tosch nor
ome schneugge em Eschtrich
ond e de alte
gwagglige Chäschte
05 was tosch nor do fendsch doch
nüd meh hender all dene
Töre wo wendsi
uf machsch tönd giepsche
fendsch nüd meh ond wenn deh
10 am Ändi emene Chaschte oder
ennere Komode
enne doch öppis // 099
fändisch de wärs
dis alt Titti weisch no
15 de Lieslopf met lähre
Augelöchere ond went au
d Schublade schnell weder tätisch
zuemache s wär scho
z schpoht ond es wörd der
20 tödele öber-
all wo d schtohsch
ond wo d gohsch.

Freitag, 03 September 1982       )

Pächsee

Mer seid är heig
es Gschleipf ond hötterli dorom
nor emmer hender
de andere noche
05 är chönn dorom halt nehd
z vorderscht em Hufe met de
andere hohtsche ond emmer (blend)
vörderzi gwaggle bes alli
zäme öbernes
10 Högerli tätid schtörchle ond abe
gheie e Pächsee
wo schwarz esch ond führig ond wommer
au wenns öpper no wett
dren ned chön schwemme.

Dienstag, 28 September 1982       )

De Chräbs

Wenn de Chräbs use
chrablet usem Tömpel
use ond ufe
a Rand chond de
05 chönt er dosse em Meer
das blau Sägel gseh
das ganz blau Sägel ofem
blaue Wasser so blau dass es
fascht nömme blau sonder ehnder
10 scho rot esch das Sägel
chönt er gseh devoh metem
Wend zäme wende. Aber
er g<s>ehds ned de Chräbs är chrablet
zrogg e sine Tömpel
15 zrogg ond schnoogget // 102
ofem Sand ond ofem
Lehm ond suecht we scho emmer
Schnäggli wo chrüchid debie
hät er fascht öppis gseh wo so
20 gross esch ond so gleitig
ond blau ond fascht no blauer esch als de Hemmel.
Es esch besser er heigs ned gseh
de Chräbs we chönnt er
Chräbs bliebe schontsch ond donde
25 bliebe em tonkle
Tömpel we chönt er?

Mittwoch, 13 Oktober 1982       )

Amschterdam

O dië
Chogegrachte vo
Amschterdam wië
grau ond
05 truurig dië
riesige
Chele ond alli
zue ond drom ome
e de rote
10 Fenschter agmolti
Huere oder au nome
Bröscht ond Votze
ond Chöpf met
offene
15 Mülere suuber e ||
Zellophan ipackt
O dië
Chogegrachte vo
Amschterdam muesch
20 nome dië ganz
Nacht drof fahre
em tonkle
Scheff ond a kener
Ländi usschtiege de tüendsdi
25 vellecht ned verschtöckle
ond ned
usschtelle ond ned
eis Teil oms ander tüendsie
de velecht ned verchaufe.
30 dië choge

Notizbuch 1979-82 (alph.)
(Total: 49 )
Notizbuch 1979-82 (Folge)
(Total: 49 )
Suchen: Notizbuch 1979-82