Ond deh hani Angscht öbercho ond ha
tänkt es esch alles
glichlig we emmer es esch
alles glichlig we emmer ond esch
05 alles ganz andrisch es esch
alles do wos emmer gsi esch d Wol-
kechratzer on d Subway
ond au de Gschmack jo
vor allem dä komisch
10 Gschmack us all ne
Schächte ufe us allne
Hüsere use ond wemmer
denne esch e de Hüsere vo de
Schtross dor d Fenschter
15 ine dä Gschmack dä
komisch Gschmack we vo frömde vo
scho lang verschtorbene frömde
Blueme dä komisch dä süesslech 
Gschmack dä esch au
20 emmer no glichlig
ond är esch anderisch alles
esch ganz anderisch dië 
gwagglige farbige Hüsli zwösche de
Wolkechratzere enne ond dië verrockt
25 toskanisch Villa of dem
alte Wolkechrätzerli obe em Village
alles alles esch glichlig ond de
Gschmack dä komisch dä süesslech
Gschmack us de Schächte use ond us
30 de Hüsere use ond dor alli
Fenschter ine e d Hüser
esch glichlig wener
emmer gsi esch ond esch
ganz andrisch alles
35 esch ganz andrisch ond ech
ha Angscht öbercho
öb ech öppe nömme
de glichlig sig ond öb ech
öppe of einisch
40e andere sig e
grusigi Angscht.